एसटी महामंडळात मोठी भरती – चालक व सहाय्यकच्या एकूण १७,४५० पदांसाठी नोकरीची संधी
मुंबई (२० सप्टेंबर २०२५) : महाराष्ट्र राज्य मार्ग परिवहन महामंडळात (एसटी) हजारो तरुण-तरुणींना रोजगाराची सुवर्णसंधी उपलब्ध होत आहे. राज्यात येत्या काळात ८ हजार नवीन बसेस मार्गावर उतरविण्याचा निर्णय घेतला आहे. या नव्या बसेस कार्यान्वित करण्यासाठी मोठ्या प्रमाणात चालक व सहाय्यक मनुष्यबळाची गरज आहे. याच पार्श्वभूमीवर कंत्राटी पद्धतीने १७,४५० चालक व सहाय्यक पदांची भरती प्रक्रिया राबविण्यात येणार असल्याची माहिती परिवहन मंत्री तथा एसटी महामंडळाचे अध्यक्ष प्रताप सरनाईक यांनी दिली.
ई-निविदा प्रक्रियेद्वारे भरती
एसटी महामंडळाच्या ३०० व्या संचालक मंडळाच्या बैठकीत या संदर्भात महत्त्वाचा निर्णय घेण्यात आला. त्यानुसार, आवश्यक चालक व सहाय्यक मनुष्यबळ ३ वर्षांच्या कालावधीसाठी कंत्राटी पद्धतीने उपलब्ध करून घेण्यासाठी ई-निविदा प्रक्रिया राबविण्यात येणार आहे. ही प्रक्रिया विभागनिहाय – म्हणजेच राज्यातील ६ प्रादेशिक विभागांनुसार होणार असून येत्या २ ऑक्टोबरपासून निविदा प्रक्रिया सुरू होणार आहे.
रोजगाराची मोठी संधी व वेतन
या भरती प्रक्रियेच्या माध्यमातून राज्यातील हजारो बेरोजगार युवक-युवतींना रोजगार मिळणार आहे. कंत्राटी पद्धतीने निवड झालेल्या उमेदवारांना दरमहा किमान ३०,००० रुपयांपर्यंत वेतन देण्यात येईल. याशिवाय, नव्याने रुजू होणाऱ्या चालक व सहाय्यकांना एसटी महामंडळाकडून आवश्यक ते प्रशिक्षण देखील दिले जाणार आहे.
दर्जेदार बससेवा देण्याचा उद्देश
बसेसची संख्या वाढविण्यामुळे प्रवाशांना अधिक चांगली, सुरक्षित आणि दर्जेदार सेवा पुरविणे हे एसटीचे ध्येय आहे. नवीन मनुष्यबळाच्या भरतीनंतर राज्यातील प्रत्येक भागात प्रवाशांना अखंडित बससेवा उपलब्ध करून देणे शक्य होईल, असा विश्वास परिवहन मंत्री प्रताप सरनाईक यांनी व्यक्त केला. तसेच, या संधीचा हुतकरू तरुणांनी पुरेपूर फायदा घ्यावा असे आवाहनही त्यांनी केले.